SEKTION BRANDIS

aktuell

 PDF-DokumentTouren- und Tätikeitsprogramm 2024

Hochtour Fründenhorn (neues Ziel)

Samschti:
Mitem Zug simer bis Kanderstäg gfahrä u hei vo dert us der Bus gno bis zur Gondelstation. Mit äbe denä Gondeli simer no ueche zur Bärgstation grittä. Vo dert us isches los gangä richtig Oeschinensee u der stotzig Wäg ueche zur Fründehütte. Mir hei aui chly z kämpfe gha mit de warme Temperaturä, numä der Remo het sech i sinä längä hosä pudeli wou gfüeut. Dobä bir Hüttä heimer no d Sunnä u di schöni Ussicht gnossä bises de es feins Hütteznacht het gä. Bevor dasmer si ga schlafä, heimer no der wunderschön Sunneungergang bestuunet. (Sarah)

Sonntag: 
Nam Zmorgä heimer nis i 2 Seilschaftä agseilet u sy übere Gletscher zum Fuess vom Fründehorn glüffä. Übere Gletscher het komischerwiis es warms Lüftli gwäit, was üs aui zimlech ungwönlech isch vorcho. Das isch aber schnäu vergässe xi, womer nis a Ufstig gmacht hei. Im Zig Zag isches ufwärts gangä bis vorz Firnfäud. Dert heimer d Stigisä a gleit u si düre Schnee zum Gipfu glüffä. Füre Abstig heimer der glych Wäg zur Hüttä gno. Uf der sunnige Terrasse heimer nis es Pöiseli gönnt u heinis aschliessend no a Abstig gmacht. Bim Oeschinensee heimer de no d Füess badet. Trotz Turbine hetsech d Sabine iz wasser getrout und d Sarah isch ou froh gsi hetsi mau us de Schue chönne.
Z Gondeli heimer üs ou zum ache ga gönnt. Am Bahnhof hets no ä Glace zur Abchüelig gäh und när isches mitem Zug oscho wider Richtig hei gange. (Milena)